Paumanhin sa mga kaibigan kong taga-PUP, pero

PUPtang ina

Mapapamura din kayo kung sa inyo nangyari ang naranasan namin ng kapatid ko sa PUP noong isang araw. Pumunta kami doon para kunin ang kanyang transcript, honorable dismissal at card. Kailangan na kasi ng kapatid ko iyon para makapag-enroll sa ibang pamantasan.

Dumerecho kami sa Receiving Office para ipakita ang claim slip na dala ng kapatid ko. December pa lang ay nakapagrequest na siya at ayon sa slip na iyon ay kukunin na lang niya ang kanyang mga papeles sa nasabing opisina. Pero hindi pala ganoon kasimple yun. Kailangan niya raw ipakita ang kanyang resibo, sabi ng naiiritang clerk. Hinahanap namin ang resibo nang maisip kong hindi ba kaya nga may claim slip na ang kapatid ko ay dahil naibigay niya na ang resibo? Pinabalik ko ang kapatid ko sa window kung saan itinuro siya sa kabilang window ng naiirita pa ring clerk. Ngumisi naman si clerk number 2 at sinabing sa registrar's office daw kinukuha iyon.

Punta naman kami ng registrar's office. Pagkatapos ng sampung minuto sa pila ay kinuha ni clerk number 3 ang claim slip, tumingin sa ilang folder at pagkatapos ay sinabihan kaming wala raw ang mga dokumento roon. Tanungin daw namin ang Receiving Office kung saan nila pinadala ang mga dokumento.

Balik kami sa Receiving office. Ako na ang nagsabi ng sinabi ni clerk number 3 kay clerk number 2. Nagtext siya sandali tapos sinabi sa aking sigurado daw silang napadala na sa Registrar's ang mga papeles ng kapatid ko.

Registrar's uli. Iba naman ang naisip ni clerk number 3. Pumasok daw kami at tanungin si clerk number 4. Pagdating namin sa loob, bago ako makapagsalita ay itinuro sa amin ni clerk number 4 ang mga nakatambak na folder. Hanapin daw namin doon. Hinanap namin, at wala ang mga papeles. Pagkatapos sinabi niyang "Ay, iba pala ang hinahanap niyo. Akala ko yung mga nandyan. Pakitanong si clerk number 5." Itinaas ni clerk number 5 ang kanyang tingin. Tumingin tingin sa ilang folder, at sinabi sa aming "Baka hindi dito pinadala. Kasi kung pinadala dito, nandito yun. Pakitanong uli..."

Sa Receiving office, pumasok na kami ng kapatid ko para tanungin ang isang mukhang personnel head. Nakatawa niyang pinakinggan ang mga sinabi namin at nagsabing "Kasama ka kasing pumasok e. Kaya hindi kayo inentertain. Dapat kapatid mo lang ang pumasok para asikasuhin siya." Sasapakin ko na sana yung mama, kaya lang naisip kong baka lalong hindi makuha ng kapatid ko ang kailangan niya.

Pumunta kami uli sa Registrar's, at kapatid ko lang ang pinapasok ko. Mula sa labas ay nakita ko siyang dinadaan daanan ng mga clerk, hanggang may isang tumingin sa kanya at tinanong niya. May tiningnan silang isang log book, at pagkatapos ay lumabas ang kapatid kong maluha luha. Sabi daw sa kanya ni clerk number 6, nasa logbook na si clerk number 7 ang nakatanggap ng papeles niya. Pero hindi na raw pumapasok si clerk number 7.

Wala akong dalang granada, kaya nag-isip na lang ako ng ibang paraan. Naisip ko na baka pwedeng ipaforward na lang ang mga papeles sa pamantasang pupuntahan ng kapatid ko. Pasok ako ng Registrar's at nagtanong kay clerk number 8. Pangalawang salita ko pa lang ay nakaturo na siya sa Admission Office.

Sa admission Office, malayo si clerk number 9 sa window kaya kinailangan kong itapat ang mukha ko sa mababang butas ng window. Hindi niya ata ako naintindihan kaya pumasok na lang ako sa opisina para maghanap ng ibang matatanungan. Sa loob, may kausap ang sekretarya. Pinag-uusapan nila kung paano makakarequest ng bagong table, kung bakit kailangan nang palitan ang kanilang table. Pagkatapos may dumating pa at pinag-usapan naman nila kung gaano kagaling ang kanilang head magrequest ng mga table. Mukhang mahaba pa ang kanilang usapan kaya lumapit na ako at nagpaumanhin. Pagkatapos ng una kong pangungusap, nakaturo na ang kamay ni clerk number 10(yung nagsasalita tungkol sa pangangailangang magrequest ng bagong table) sa window kung saan naroon si clerk number 9. Hinila ko na ang kapatid ko palabas. Sabi ko sa kapatid ko, "Buti pala nag-drop ka na sa school na ito e." Pero cool lang, cool lang dapat.

Balik kami sa Registrar's. Sabi ko sa kapatid ko pakiusapan mo yung katable ni clerk number 7 na baka naman pwedeng kunin niya na lang ang dokumento para sa kapatid ko at sabihan na lang si clerk number 7. Tawagin natin siyang clerk number 11. Mabait naman si clerk number 11, pero may kailangan daw na form mula sa Receiving.

Takbo kami sa Receiving. Binigyan kami ni clerk number 2 ng form pagkatapos magtext. Takbo naman sa Registrar's. Sabi ni clerk number 11, kailangan pa daw ang pirma ng principal ng high school na pinanggalingan ng kapatid ko. Woooooooooooooooooooooooooooooooooooooooooooooooooooooooooooooo
kkkkkkkkkkkkkkkkkkkkkkkkkkkkkkkkkkkkkkkkkkkkk
eeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeee
yyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyyy
yyyyyyyyyyy
yyyyyyyyyyyyyyyyyy.

PUPtang ina talaga.